Y Dref Werdd yn Cyflwyno Prosiect Sgwrs

Rydym wedi bod yn brysur iawn yn yr Hwb Cymunedol dros y misoedd diwethaf yn siarad â phobl yn ein cymunedau er mwyn adnabod yr heriau sydd wedi eu hwynebu drwy gyfnod y pandemig. Un o’r pethau mwyaf trawiadol y gwnaethom ganfod oedd yr holl unigolion sydd wedi bod yn teimlo’n unig ac ynysig dros y cyfnod, ac yn parhau i deimlo fel yma. Felly, rydym wedi bod wrthi’n sefydlu cynllun cyfeillio newydd dros y ffôn er mwyn ymateb i’r her hon ac yn gobeithio y gwelwn bywyd yn gwella rhywfaint i lawer un.
 

Rydym yn chwilio am Gyfeillwyr caredig fydd yn rhoi galwad ffôn am hyd at un awr bob wythnos i Ffrind er mwyn cael sgwrs gyfeillgar a chodi calon. Dyma rai o’r manteision y gall cefnogaeth gyfeillio ei roi- 

• Gostwng iselder
• Cynyddu sgiliau cymdeithasol
• Gostwng arwahanrwydd cymdeithasol
• Cynyddu hunan reolaeth
• Cynyddu hunan-barch a hyder
• Gostwng y risg o fod yn fregus a chael camdriniaeth
• Codi ymdeimlad o bwrpas  

Felly, fel y gwelwch, mae llawer iawn o fudd i’w gael o’r cynllun i Ffrindiau ond yn ogystal, gall Cyfeillwyr gael budd mawr drwy fod yn rhan hefyd, drwy werthfawrogi eu bod yn helpu eraill, gan dderbyn cefnogaeth a phrofiad, i fod yn rhan o gymuned, i wneud rhywbeth newydd ac i wneud rhywbeth gwerthfawr i eraill. Byddwn yn diogelu pawb drwy roi Cyfeillwyr newydd drwy wiriadau’r Gwasanaeth Datgelu a Gwahardd (DBS) ac yn ei arfogi â phecyn hyfforddiant ac adnoddau ar gynnal sgyrsiau iach a buddiol. 

Os oes gennych ddiddordeb bod yn rhan o gynllun Sgwrs, mi fyddwn yn falch iawn o glywed gennych.
Yn yr un modd - os ydych chi’n adnabod rhywun fyddai’n gallu elwa o gynllun Sgwrs, gadewch i ni wybod ac mi wnawn fynd ati i drefnu galwad cyson i godi eu hwyliau. 

Cysylltwch â:
Non Roberts, Cydlynydd Gwirfoddolwyr Cymunedol
Rhif ffôn - 07385 783340
E-bost - non[AT]drefwerdd.cymru

Facebook - @HwbCefnogiCymuned
Twitter - @hwb_cymunedol

----------------------------------------------

Ymddangosodd yn wreiddiol yn rhifyn Tachwedd 2020