Tocyn Unffordd i Lawenydd ac Annibyniaeth

Mwy o newyddion o gangen Bro Ffestiniog o'r ymgyrch dros annibyniaeth i Gymru

Roedd caffi Antur Stiniog yn llawn i’r ymylon eto ar nos Wener y 5ed o Ebrill, wrth i griw Yes Cymru Bro Ffestiniog gyflwyno’r olaf -am y tro- o’u nosweithiau o adloniant, diwylliant, a chwyldro. 

Hon oedd yr wythfed noson yng Nghyfres Caban; Gwyneth Glyn a Twm Morys oedd yn canu a diddanu’r gynulleidfa efo straeon difyr i gyflwyno pob cân, er enghraifft Tocyn Unffordd i Lawenydd a gyfansoddwyd am eu bod yn teimlo’r angen am gân hapus fel gwrthbwynt i’r caneuon gwerin trist a lleddf yn eu nosweithiau. 

Cafodd eu cân Jini dderbyniad arbennig; deuawd di-gyfeiliant yn seiliedig ar lythyr Hedd Wyn o’r ffosydd i’w gariad ym Mhantllwyd, Jini Owen. Hyfryd iawn. Yn rhoi sgwrs y tro hwn oedd yr awdur o ochrau Machynlleth, Mike Parker, yn cyflwyno syniadau difyr iawn am ffiniau ac annibyniaeth, ac yn darllen pytiau o’i lyfr diweddaraf ‘All The Wide Border’. Diolch i bawb am eu cefnogaeth eto. 

Bydd y gyfres yn ail-ddechrau ym mis Medi; gadewch i’r gweithgor lleol wybod pwy yr hoffech chi weld yn canu a sgwrsio nesaf!

Ar y 13eg o Ebrill ymunodd y gangen leol ag ymgyrch genedlaethol Yes Cymru i dynnu sylw at yr anhegwch fod yr holl incwm o diroedd y goron yng Nghymru yn mynd yn syth i drysorlys Llundain ac i deulu’r brenin, gan gynnwys incwm o gynhyrchu trydan dŵr a gwynt; pibelli dŵr a cheblau dosbarthu trydan; rhent pori, pysgota; trwyddedau i gloddio am lechi; ac yn y blaen. Mae hyn wedi ei ddatganoli i’r Alban, a senedd a phobol yr Alban sy’n cael dewis sut i fuddsoddi a gwario’r arian hwnnw! Mae cannoedd o aceri o dir y goron yn lleol; ni, pobl Cymru ddylia fod yn berchen ar y rhain, neu o leiaf yn cael elwa o’u hincwm.

Cynhaliwyd cyfarfod blynyddol cyflym ac wedyn cwis hwyliog dan ofal Idris Morris Jones yn y Pengwern ar nos Iau y 9fed o Fai. 

 Mae’r faner a gawsom gan ymgyrch annibyniaeth Llydaw yn noson Caban Chwefror, bellach wedi ei throsglwyddo i’r Cyngor Tref i’w hychwanegu at eu casgliad rhagorol o faneri. 

Bu'r ‘Gwenn ha Du’ yn cyhwfan dros Sgwâr Diffwys am gyfnod o Ddydd Gŵyl Erwan ar y 19eg o Fai.
- - - - - - - - -

Ymddangosodd yn wreiddiol ar dudalen flaen rhifyn Mai 2024