Lluniau Traws

Gan fod rhifyn Gorffennaf mor orlawn, bu'n rhaid gadael llwyth o luniau allan, yn anffodus.
Dyma nhw:

Llongyfarchiadau i dîm dan 9 oed Bro Hedd Wyn Celts ar ennill pob un gêm yn y gynghrair y tymor yma.  Mae'r tîm hefyd wedi bod yn llwyddiannus mewn sawl cystadleuaeth gan gynnwys Twrnament Penrhyndeudraeth ar Fehefin 8fed.
Gerwyn Dafydd dderbyniodd y tlws am gael ei ddewis yn 'chwaraewr y gêm' amlaf yn
ystod y twrnament.  Da iawn Gerwyn a'r tîm.

Da iawn i dîm rasio ‘chariot’ y Clwb ffermwyr Ifanc, ddaeth yn drydydd. Roedd naw aelod i’r tîm, 6 aelod i dynnu’r cerbyd sef Dafydd, Casha, Guto, Llyr, Owen a Robat Sion, dau i deithio ynddo i ochor arall y cae sef Sion Lloyd a Carwyn i achub merch, Ffion Prysor cyn dychwelyd yn ôl fel tîm.  

Llongyfarchiadau mawr iawn i Elan. gafodd y wobr gyntaf yn Eisteddfod Genedlaethol yr Urdd ar y llefaru unigol i ddisgyblion blwyddyn 5 a 6 gyda'i dehongliad o 'Steddfod yn fy Stafell'.  

A47Dim!

Darn o un o erthyglau tudalen flaen rhifyn Gorffennaf. Gallwch ddarllen y cyfan yn Llafar Bro.

Ydi ffordd enwocaf Cymru- yr A470- ar fin cael ei ‘symud’?  Dyma’r hyn ddywed y cyngor tref:

Mae’n bosib y caiff y prif ffyrdd ym Mlaenau Ffestiniog a Llan eu hail-ddynodi i wella diogelwch, dibynadwyedd teithiau, a'r amgylchedd yng nghanol y dref a chymunedau cyfagos.”

Mae cynghorwyr Tref Ffestiniog wedi croesawu llythyr gan Edwina Hart, Gweinidog Llywodraeth Cymru dros yr Economi, Gwyddoniaeth a Thrafnidiaeth, lle mae hi'n dweud bod ei swyddogion ar hyn o bryd yn adolygu statws y ffyrdd ac mae’n bosibl y caiff yr A470 a'r A496 eu hail-ddynodi.

"Mae Llywodraeth Cymru newydd wneud buddsoddiad sylweddol i wella canol tref y Blaenau, i greu amgylchedd cyhoeddus bywiog ac annog pobl leol ac ymwelwyr i dreulio amser ac arian yma.  

Mae'r traffig trwm trwy ganol y dref yn tanseilio’r nod o adfywio’r dref. " Y Cyng. Mandy Williams Davies.

 

Rhifyn Gorffennaf

Mae rhifyn Gorffennaf yn boeth o'r wasg, a chriw Clwb Ffermwyr Ifanc Traws wedi dod draw i helpu'r selogion i'w blygu.

Llwyth o erthyglau-

A47Dim!
'Symud' ffordd enwocaf Cymru, yr A470

Atomfa 20
Ugain mlynedd i'r mis ers i Magnox gyhoeddi 'cau' atomfa Traws.

Blodyn a dyfodd yn Flodeuwedd
Erthygl gan Arwel Gruffydd, cyfarwyddwr artistig Theatr Genedlaethol Cymru

Beicio Bro
Newyddion a hanes o fyd y beics

Bwrw Golwg
Cyfres newydd am gymeriadau hanesyddol Bro Ffestiniog

Stolpia, Pigwr, Y Golofn Werdd, Antur Stiniog, chwaraeon, newyddion, cyfarchion...
...a llawer iawn mwy!

Rhiannedd

Gyda Chor Rhiannedd y Moelwyn wedi ail-ffurfio'n ddiweddar, mewn bwrlwm o ddiddordeb a brwdfrydedd, gyrrodd Marian Roberts, Manod gerddi o waith RJ Roberts (Dolanog gydag Englynion a Cherddi Eraill; 1967), atom yn canu clodydd y cor gwreiddiol, dan ofal Dora Edwards. Gallwch weld y cyfan yn rhifyn Mehefin 2013 o Llafar Bro.

Côr Rhiannedd y Moelwyn.

Côr enwog cu Rhiannedd – Y Moelwyn

A'u melys felodedd;

Ar Feirion dyry fawredd

         Swyna wlad â phersain wledd.

Dyma “Gôr Merched Dora”, - a hanes

Cynnydd ei hir yrfa;

Yn amod y cawn yma

  Felys dwf, o leisiau da.

Ha Ferch! dy gôr ardderchog – a ddringodd

I rengau byd enwog;

A thrwy bur lafur di-log

           Gwnest enw da i ganu 'Stiniog.

Cor Rhiannedd 2013

Melltan igam-ogam

Rhan o erthygl yn rhifyn Mehefin 2013 gan Tecwyn Vaughan Jones.

Mae gan Lundain ei Gherkin rhyfedd ond mae gennym ni yn Stiniog ein Cynion a’r Fellten. 

Mae’r cerflun hwn gan David Nash yn addurno’r ffordd i mewn i Flaenau Ffestiniog o gyfeiriad Rhiw ac ar ochr y ffordd mae’n destun cryn ddadlau. 

Fe wnaeth David Nash y cerflun gwreiddiol allan o bren … ac ef bellach yw prif gerflunydd sy'n gweithio gyda phren ym Mhrydain os nad y byd. Ond mae’r cerflun hwn o fellten yn taro wedi ei wneud o ddur a dros amser bydd yn ymddangos fel ei fod yn rhydu ac yn troi’n goch. 

Mae rhai hefyd yn gweld siâp y llwybr igam ogam sy'n esgyn i ben tomen yr Oakeley yn y cerflun ac mae’n hawdd cymharu gan fod y llwybr yn union du ôl i’r cerflun.

Dyma’r unig gerflun o eiddo Nash sydd yn cael ei arddangos yng Nghymru ar hyn o bryd a theilwng iawn ei fod wedi cytuno i roi y cerflun hwn i sefyll yn y dref sydd wedi bod yn gartref iddo ers bron i hanner can mlynedd. Mae’r cerflun yn un trawiadol ac mae amryw wedi teithio i Stiniog yn un swydd i gael ei weld … byddai’n wych petai mwy o’i gerfluniau yn cael lle anrhydeddus yn nhirlun Stiniog. 

Mae cymaint yn y dref hon sy’n tynnu sylw … yn wir mae llawer o olygfeydd unigryw yma. Dywedodd Falcon Hildred yn ei lyfr diweddaraf: ‘Rwy’n credu mai tref Blaenau Ffestiniog a’r dirwedd leol yw’r enghraifft gorau a mwyaf cyflawn o dirwedd ddiwydiannol  ym Mhrydain. Nid yw hwn wedi ei stwffio i ryw amgueddfa ond mae o’n cwmpas i’w weld bob dydd ‘… rhaid felly i’r ymwelydd brofi Stiniog yn hytrach na jyst gweld y dref.

Lluniau gan TVJ.