Cyngerdd Eric Jones a'r Calendr Bro

Mae llwyth o bethau'n digwydd yn lleol dros y gaeaf; does dim esgus i aros yn y ty o flaen y bocs. Yn rhifyn Tachwedd, gallwch weld calendr llawn o weithgareddau, yn ogystal a newyddion am nosweithiau a fu ym mis Medi a Hydref, er enghraifft y Cyngerdd Mawreddog a gynhaliwyd yn Ysgol y Moelwyn er mwyn codi arian at Apel Eisteddfod yr Urdd 2014.
Daeth llythyr i law yn canmol Cyngerdd Mawreddog , gan Nesta o Llan: gweler isod, o dan y calendr.

Mae Tecwyn, golygydd y mis wedi casglu rhestr hir o ddigwyddiadau at ei gilydd. Dyma flas:

20 Tachwedd. Cymdeithas Hanes Bro Ffestiniog

                Brian Paul, Rheilffordd Ucheldir Eryri

                7.15 Neuadd W.I.

23 Tachwedd- 4 Ionawr. Oriel Y Llyfrgell

Ffotograffau prosiect cymunedol

defnyddwyr gwasanaeth Tan y Maen.

21 Tachwedd. Pwyllgor Llafar Bro

                7.00 Neuadd W.I.

21 Tachwedd.    Sefydliad y Merched

Diwrnod Nadoligaidd ym Mhlas Tan-y-bwlch 

                a chinio Nadolig

22 Tachwedd. Y Llyfrgell.

                "Cymorth Cyntaf bob dydd"

10.30 - 12.30 ac 2.30 - 4.30 

I archebu lle, neu am ragor o wybodaeth

cysylltwch â 01766 830415

23 Tachwedd: Clwb Rygbi

            Gêm gartref

            Bro vs Dinbych

24 Tachwedd: Fforwm Hanes Tan-y-bwlch

                Gwilym Price: Atgofion Plymar

                7.30 Plas Tan-y-bwlch

26 Tachwedd: Sefydliad y Merched

                Cyfarfod Misol

                7.00 Neuadd W.I.

27 Tachwedd: Ysgol Bro Hedd Wyn

                Ffair Nadolig “Marchnad  Ffermwyr”

30 Tachwedd: Neuadd Trawsfynydd

Apêl Eisteddfod yr Urdd

Cabaret, 7.30pm

Tocynau: Gerallt Rhun, Ffôn   540681

 


CYNGERDD MAWREDDOG ERIC JONES

    "Rhoddodd y noson hwb anferthol i’r balchder sydd gennyf o fod yn un o genedlaethau o’m teulu sydd wedi eu magu yn yr ardal arbennig hon. Gwelwyd talentau lleol ar eu gorau, gan gynnwys ysgolion a phobl ifainc y dalgylch.  Clywyd pedwar côr sef Côr Cymysg Blaenau, Côr y Moelwyn, Côr y Brythoniaid a’r Côr newydd sbon o’r enw Rhiannedd y Moelwyn [gweler y pumed cor isod -Gol].  Braf oedd gweld dros 70 o ferched yn mwynhau eu hunain dan arweiniad Sylvia Ann Jones.  

Cor Ysgol Maenofferen. Mae mwy o luniau yn rhifyn Tachwedd, a gallwch weld holl luniau'r noson -ac archebu copiau- ar wefan y ffotograffydd lleol, www.ErayGuner.com    -mae cyfran o'r pris yn mynd at apel yr Urdd.

 Noson i ddathlu gwaith Eric Jones y cerddor o Bontarddulais oedd y noson, a hyfryd oedd ei weld ef a’i wraig wedi dod atom. ‘Sgŵp’ go iawn oedd hyn yn ôl y llywydd medrus, Delyth Gray, ac roedd ef a’i wraig yn amlwg wedi mwynhau’r noson yn fawr. Fel y dywedodd Delyth, er bod cymaint i’n herbyn fel tref ac ardal gyda’r toriadau gwallgof i’n gwasanaeth iechyd, mae ardal y Blaenau yn gallu casglu cymaint o dalent at ei gilydd i gynnal noson a erys yng nghof llawer ohonom.  Da iawn!"

Rhifyn Tachwedd wedi cyrraedd!

Mae rhifyn Tachwedd yn llawn dop o erthyglau a hanesion a lluniau a chyfarchion!
Dyma rifyn mwyaf swmpus y flwyddyn, 24 tudalen: llai na dwy geiniog y dudalen am berlau'r fro!

Mae llun o Glwb Cerdded Stiniog ar y clawr, a'u haelodau nhw, ynghyd a Merched y Wawr Blaenau, a'r criw selog arferol, fu yn neuadd y WI yn plygu'r rhifyn bympar yma. Diolch iddynt am eu gwaith.

Os nad oes dosbarthwr yn eich milltir sgwar, brysiwch allan i'w nol o'r siopau lleol, a thra ydych chi yno, gwariwch bunt neu ddwy arall, er mwyn cadw ein pres yn lleol.

Diolch i bawb am eu cefnogaeth eto. Cofiwch y bydd cyfarfod o'r pwyllgor nos Iau yr 21ain o Dachwedd am 7 yn stafell gefn neuadd y WI. Croeso mawr i bawb.

Atgofion Golffio

Gan fod y Clwb Golff Ffestiniog yn paratoi i gau'r drysau am y tro olaf, daeth ein gohebydd yn y Llan, ar draws hen atgofion difyr iawn gan Franko, o 1969. Dyma ddetholiad o'r straeon ymddangosodd yn rhifyn Hydref, sydd dal yn y siopau am ychydig ddyddiau eto.

Mae Nesta'n cyflwyno'r darn fel hyn:

'Franko wrth gwrs ydi'r cymeriad annwyl -mab i Morris Evans- sef Frank Evans fu'n cynhyrchu 'Oel Taid' fel y galwai o OEL MORRIS EVANS.'

Lluniau:
bathodyn oddi ar wefan y clwb golff; ffotograff o wefan siambr fasnach Blaenau Ffestiniog.


 

DYDDIA' GOLFF YN STINIOG

Roeddwn yn dechrau chwarae golff yn y flwyddyn 1906... cof sydd gennyf o fynd i Ben y Cefn fin nos. Roedd Joe Hughes -un o golfers gorau fu erioed yn chwarae yno- yn dysgu puttio ar y green olaf.  Dyma Joe yn betio efo fi y buasai’n dreifio ei bêl oddi ar ei Hunter Watch oedd newydd ei chael y bore hwnnw. 

Dyma Joe yn gosod ei bêl ar y watch, ac yn dreifio, a'r peth nesaf a welwn oedd y watch a’r bêl yn mynd, a’r watch yn ddarnau, a Joe yn edrych yn syn.  

Dro arall, roedd ryw chwech ohonom yn chwarae efo’n gilydd ‘Penny a Hole’.  Cafodd Wil John drive dda, ond tra roedd yn chwilio am ei bêl, bu i Harry Baker a minnau roi carreg fawr wrth y bêl, a bu Wil yn damio’r hen garreg, ond bu i Harry Baker a minnau fethu dal heb chwerthin.  “Y diawliaid sâl, “ meddai Wil gan symud y garreg.  Rhaid oedd gadael iddo ennill y twll hwnnw, a thalu’r geiniog iddo i dawelu’r storm.

                                                     ----------------------------------------

Hefyd, yn rhifyn Medi, bu gohebydd arall, ac aelod o'r clwb, Pegi, yn codi atgofion am y clwb o rifynnau cyntaf Llafar Bro ym 1975.

Fis Ebrill diwethaf dechreuwyd chwarae golf ym Mhen-y-Cefn, Llan Ffestiniog am y tro cyntaf ers cyn y rhyfel. Ers amser bellach mae’r Pwyllgor Llywio wedi bod wrth y gwaith o ddod a threfn yn ôl i’r lle a hynny yn wyneb llu o anawsterau. Nid gwaith hawdd na rhad yw sefydlu clwb golff o’r newydd. Bu’n rhaid cael contractiwr i wneud y gwaith o osod glasdiroedd (greens)  ac i dorri ffosydd i sychu’r rhannau gwlypaf. Bu dibynnu hefyd ar lawer o waith gwirfoddol.

Cafwyd cyfraniad hael gan yr hen Gyngor Dinesig tuag at y costau a dyna paham y teimlodd y pwyllgor hi’n ddylestswydd cadw’r tâl aelodaeth mor rhesymol a phosibl er mwyn rhoi cyfle i bobl y cylch fanteisio ar y cyfleusterau ac mae’n braf medru cofnodi fod llawer wedi gwneud hynny. Eisioes mae rhif yr aelodaeth bron yn 100, a chyfartaledd da o’r rheiny yn blant a phobl ieuainc. Hyd yma cynhaliwyd dwy gystadleuaeth ac roedd yr eiddgarwch y gymryd rhan yn galonogol iawn bob tro. Dichon fod dyfodol y clwb yn ddiogel iawn am flynyddoedd i ddod.

Credwn mai Clwb Golff Ffestiniog yw’r cyntaf i weithredu polisi o ddwyieithrwydd, fel y gellir gweld o’u cardiau sgorio. At hwnnw mae’r rheolau i’w cael mewn Cymraeg a Saesneg a diddorol hefyd i’r enwau a roddwyd i’r gwahanol dyllau ar y cwrs. Nid enwau gwneud mohonynt ond enwau oedd eisoes yn perthyn i’r Cefn ac i’r ardal. Mae’r pwyllgor yn hyderus y bydd Clwb Golff Ffestiniog, ymhen ychydig flynyddoedd, yn ennill poblogrwydd ac yn denu llawer iawn o chwaraewyr o bell ac agos. 

                                                     ----------------------------------------------------

               Tabl y tyllau a'r map o wefan y clwb.                                    

                                                  ----------------------------------------------- 

Tynnwyd y llun isod gan Alwyn Jones ar y 18fed o Awst eleni: 

Merched y clwb yn cychwyn allan ar ddiwrnod Capten y Merched, a hynny am y tro olaf. 

Gwyl rhif 6

Darnau o rifyn Hydref, efo hanes y band arian a'r Brythoniaid yng ngwyl gerddorol Portmeirion.

SEINDORF yr Oakely:

Ers dros chwarter canrif bellach bu’r band yn diddori ymwelwyr ym Mhortmeirion ar brynhawniau Sul trwy gydol yr haf gyda channoedd yn gwerthfawrogi ac yn mwynhau eu cerddoriaeth.  Yn goron ar hynny eleni  cafwyd gwahoddiad yn ôl ddiwedd yr haf i berfformio yn y pentref hudolus hwn yng ngŵyl No.6.  

 Cafodd yr Oakeley groeso penigamp gan y gynulleidfa o filoedd yn curo dwylo a ddim am i’r band dawelu!  Ar ôl y perfformiad bu cyfle i’r aelodau ymlacio i fwynhau gweddill yr ŵyl.  Penwythnos o adloniant gwerth chweil.

Gŵyl Gelfyddydau’r Bermo: Braint arall i’r Oakeley oedd cael agor Gŵyl Gelfyddydau'r Bermo ddechrau mis Medi.  Cafwyd cyngerdd mawreddog a’r band yn brif westai yn agor yr ŵyl yn Theatr y Ddraig, Bermo.

Jazz:  Y drydedd ŵyl i’r band fod a chysylltiad â hi eleni oedd Gŵyl Jazz Abersoch ar ddiwedd mis Medi. Daeth nifer fawr i wrando ar y band yn chwarae  yng nghanol y pentref a phawb  i weld yn mwynhau a chael hwyl.

COR y BRYTHONIAID:

Roedd y croeso a gawsom yn fyddarol, yn gymysgfa wallgo o floeddio a chymeradwyo, yn ddigon i synnu hyd yn oed aelodau mwyaf profiadol y Côr - profiad bythgofiadwy! Dyma ddechrau gyda’r gân a ddaeth a’r Côr i amlygrwydd ym Mhortmeirion yn 2012, sef “Blue Monday”. Croesawyd y gân gyda bonllef wrth i’r gynulleidfa adnabod y cordiau agoriadol, ac yn fuan roedd ‘na  lawer o siglo a dawnsio egnïol - rhywbeth eithaf anghyfarwydd i’r Côr! 

Wedi’r fath ddechreuad gwych aeth y Côr o nerth i nerth, gyda phob cân yn cael derbyniad gwresog a gwrandawiad hynod werthfawrogol. I ddarfod y noson fe ganodd y Côr eu caneuon newydd a safodd y dorf are eu traed. 

Roedd y profiad yn un gorfoleddus i bob aelod o’r Côr, yn un a fydd yn aros yn y cof am gyfnod maith. 

Ar ddiwedd tri pherfformiad roedd y Côr uwchben eu digon, ac er iddynt berfformio pedair noson yn olynol ni chlywyd neb yn cwyno nag yn edliw. Dyma brofiad fydd yn aros gyda ni am hir iawn!